ભરૂચ: ઝઘડિયાના લિમોદરા ગામે ઝેરી દવા ગટગટાવી લેતા યુવાનનું મોત

ભરુચ જીલ્લાના ઝઘડિયા તાલુકાના લિમોદરા ગામે ૨૨ વર્ષીય યુવકે કોઇ અગમ્ય કારણોસર ઝેરી દવા પી લેતા તેનું સારવાર દરમિયાન મોત નિપજયું હતુ.

મળતી વિગતો અનુસાર ઝઘડીયા તાલુકાના લિમોદરા ગામે રહેતા રતિલાલ ખાલપા વસાવાને સંતાનનાં બે પુત્રીઓ અને એક પુત્ર છે. ગતરોજ રતિલાલભાઇનો દિકરો રાજેશ સવારના નવેક વાગ્યાના સમયે મજુરીએ જવાનું કહીને ઘરેથી નીકળ્યો હતો ત્યારબાદ ખબર મળી હતી કે રાજેશ ગામની બહાર જમીન પર પડેલ છે. આ વાતની ખબર મળતા રતિલાલભાઇ ત્યાં આવ્યા હતા. રાજેશ ત્યાં ઉલ્ટી કરતો હતો. રાજેશને પુછતા જાણવા મળ્યુ કે તેણે જાતે ઝેરી દવા પી લીધી હતી. તેમ કહીને તેણે બોલવાનું બંધ કરી દેતા તેની હાલત ગંભીર જણાતા તેને ઝઘડીયા સેવારુરલ હોસ્પિટલ લઇ જવાયો હતો.ત્યારબાદ વધુ સારવારની જરુર જણાતા ભરુચ સિવિલ હોસ્પિટલ ખાતે લઇ જવાયો હતો, જ્યાં સારવાર દરમિયાન રાજેશનું મોત નિપજયું હતું. બનાવની તપાસ ઝઘડીયા પોલીસ ચલાવી રહી છે.