ભરૂચ: દહેજ રોડ પર ખાનગી બસ ડીવાયડર કૂદી રોંગ સાઈડ જઇ ચઢી,બાઇક ભટકાતા એક વ્યક્તિનું મોત

ભરૂચ દહેજ રોડ પર આવેલ એકસાલ ગામ નજીક અજન્ટા ફાર્મા કંપનીની શિફ્ટ બસ ડિવાઈડર કૂદી બે બાઇક ચાલકો ને અડફેટે લેતા એક નું મોત થયું હતું જ્યારે અન્ય એક ને ગંભીર ઇજા થઇ હતી. દહેજ ખાતે આવેલ અજન્ટા ફાર્મા કંપનીની સેકન્ડ શિફ્ટની બસ કર્મચારીઓને લઈને ભરૂચથી દહેજ તરફ જઈ રહી હતી તે દરમ્યાન એક્સાલ ગામ પાસે બસના ચાલકે સ્ટિયરિંગ પરનો કાબૂ ગુમાવતા બસ ડીવાઇડર કૂદીને સામેની બાજુ પર બાઇકને અડફેટે લેતા બન્ને બાઈક સવારોને ગંભીર ઇજા પહોંચી હતી.

અકસ્માતના પગલે બસમાં સવાર કર્મચારીઓ પણ એક તબકકે ગભરાઈ ગયા હતા તો આસપાસના લોકો પણ ભેગા થઈ ગયા હતા.અકસ્માતમાં એક્સાલના બાઇક સવાર હરિભાઈ તેમજ નરેશ ભાઈને ગંભીર ઇજા પહોંચી હતી.તેઓને 108 એમ્બ્યુલન્સ સેવા મારફતે સારવાર અર્થે ભરૂચ હોસ્પિટલ ખાતે લઈ જવામાં આવ્યા હતા.જ્યાં હરિભાઈનું મોત નીપજયું હતું.બનાવ અંગે પોલીસે ગુનો નોધવાની તજવીજ હાથ ધરી છે