અંકલેશ્વર: ઉમરવાડા નજીક નહેરમાં નહાવા ગયેલ 8 મિત્રો.પૈકી એક યુવાન તણાયો, ફાયર વિભાગે ભારે જહેમત બાદ મૃતદેહ બહાર કાઢ્યો

ધગધગતી ગરમીમાં ઠંડક મેળવવા લોકો નદી કે નહેરમાં નાહવા જતા હોય છે ત્યારે આજરોજ અંકલેશ્વરના સારંગપુર સ્થિત મીરા નગરના 8 જેટલા મિત્રો નાહવા માટે અંકલેશ્વરના ઉમરવાડા પાસેથી પસાર થતી ઉકાઈ જમણા કાંઠા નહેરમાં ગયા હતા.યુવાનો નહેરમાં નાહવા પડ્યા હતા તે સમયે અવધેશકુમાર નામનો યુવાન એકદમ તણાવવા લાગ્યો હતો.જેને પગલે મિત્રોએ બુમરાણ મચાવતા સ્થાનિકો દોડી આવ્યા હતા અને પરિવાર તેમજ પાનોલી નોટિફાઇડમાં જાણ કરતા ફાયર ફાયટરો સ્થળ પર પહોંચી નહેરમાં ડૂબી જતાં લાપત્તા બનેલ યુવાનની શોધખોળ હાથ ધરી હતી.ફાયર વિભાગે સતત 5 થી 6 કલાક શોધખોળ કર્યા બાદ યુવાનનો મૃતદેહ નહેરમાંથી જ મળી આવ્યો હતો. યુવાનનું મોત નિપજ્યા પરિવારમાં ગમગીની છવાઈ હતી.બનાવ અંગે પાનોલી પોલીસે વધુ તપાસ હાથ ધરી છે.