સુરત : પાસોદરા પાટિયા નજીક જાહેરમાં થયેલ યુવતીની હત્યાનો મામલો, રેન્જ આઈજી દ્વારા સીટની રચના...

સુરત જિલ્લાના કામરેજ તાલુકાના પાસોદરા પાટિયા નજીક એક તરફી પ્રેમમાં યુવકે યુવતીનું જાહેરમાં ગળું કાપી હત્યા નિપજાવી હતી, ત્યારે આ મામલે ઊંડાણપૂર્વક તપાસ માટે રેન્જ આઈજી દ્વારા સીટની રચના કરવામાં આવી છે.

સુરતના પાસોદરા વિસ્તારમાં કંપારી છૂટી જાય તેવી ઘટના બનવા પામી હતી. એક તરફી પ્રેમમાં આંધળા બનેલા યુવકે જાહેરમાં ગળું કાપીને યુવતીની હત્યા કરી નાખી હતી. ત્યારબાદ યુવતીના કાકા અને ભાઈ ઉપર પણ આ યુવકે ચપ્પુથી હુમલો કરી ઇજા પહોચાડી હતી. ઉપરાંત હત્યારાએ પોતે પણ ઝેરી દવા પીને આપઘાતનો પ્રયાસ કર્યો હતો. જોકે, હોસ્પિટલમાં સારવાર બાદ પોલીસે હત્યારા ફેનિલને કસ્ટડીમાં લીધો છે. આ ઘટના સામે આવતાની સાથે જ ગુજરાતભરમાં ઘેરા પ્રત્યાઘાતો સાથે લોકોમાં રોષ જોવા મળ્યો છે, ત્યારે આ બનાવની ગંભીરતા દાખવી રેન્જ આઈજી દ્વારા સીટની રચના કરવામાં આવી છે.

જેમાં ડીએસપી, 2 ડીવાયએસપી, 5 પીઆઈ તેમજ SOG અને LCB પોલીસ તપાસમાં જોડાશે. આરોપી ફેનીલ ગોયાણીનો કોવિડ ટેસ્ટ કરાવી તેની કામરેજ પોલીસે ધરપકડ કરી છે. તપાસ દરમ્યાન આરોપી ફેનીલે માત્ર દેખાવો કરી નશો કે, પછી ઝેરી દવા પીધી ન હોવાનું પણ સામે આવ્યુ છે. ફેનીલે નિર્દોષ ગ્રીષ્માને મોતને ઘાટ ઉતારી દેવા પૂર્વ યોજના બનાવી હોવાની પણ ચોંકાવનારી હકીકત સામે આવી છે, ત્યારે હવે પોલીસ દ્વારા આરોપી ફેનીલને કોર્ટ સમક્ષ રજૂ કરી રિમાન્ડ મેળવવા અંગે જરૂરી કાર્યવાહી હાથ ધરાશે. આ સાથે જ જરૂરી પુરાવાના આધારે સમય મર્યાદામાં આ કેસ અંગે પોલીસ દ્વારા કામગીરી કરવામાં આવી રહી હોવાનું કામરેજના ડીવાયએસપીએ જણાવ્યુ હતું.